 |
| بعد ما عاتبك تندل عناويني حيدر هواد |
بعد ما عاتبك تندل عناويني
الشاعر احمد هواد
بعد مااعاتبك تندل عناويني
من امس واصلني كونك موش ناسيني
اظروفك والمسافة اعذار محتركات
شمس انته وشتكلفك الجيه الروازيني
لجن بينت من مراسيلك بلا شوك
صلاة متأخرة بس تريد تكظيني
وكلت مالك ثمر واني ادري برحي وياك
وكلتلك عادي فيي صفصافه خليني
شسويلك بعد بهدومي اجيم النار
من تبرد جنت ودكلي دفيني
جنت هيج الرغبتك واكف استعداد
واضحكك لو عليه وبهم تجازيني
الصادمني البصدرك ماي يغزر بي
مرخصلك الدنيه وما مغليني
ومتوازي على بيعي وماحسبت احساب
خرزة وبسمك وياهوه يشريني
ما أرهم الغيرك أني الك مرسوم
خط بجف اديك شلون تمحيني
تريد تروح هسه الجرف شيرضي
والنوارس شرد اكلها من تلاكيني
المطر متعود يلاكينه ايد بأيد
ويشابكن وياه طينك وطيني
جا عشرتك عشرة موكد وسكران
تشعلني وتروح وما طفيني
خيط وابرة اذا واحد يروح انتيه
ومدري شبيك طالع طاب من عيني
كلتلك اثبت الريح الثكيلة تزيح
ومن توكع وياك توكع سنيني
ماي بشبجه بأذنك حجيي ماله مجان
ومزاجيتك الخربت بينك وبيني
روح براحتك بس مثلي تلكه منين
وبعد ما اعاتبك تندل عناويني