صفاء الصمت رثاء الشاعر زيد السومري
اعزي الگاع
گبل اهلك
گبل ربعك
اعزي الگاع
خسرت زلمه كل غبشه
گبل ليبوس چف امه يبوس الگاع
خسرت زلمه يتلگه الرصاص اشراع
زلمه الفشگ من يشتد
گبل ليشوف جسمه شبي يشوف الگاع
زلمه يصيح بگلبي ولابالگاع
اعزي الگاع
خسرت صوت
گبل الخبز ينطي الفكر للجياع
اعزي الگاع
خسرت جذر يعشگها التوالي الطين
جذر ماينتمي الخارج حدود الطين
فطن من فاضت الضلمه علي ماضاع
عطشان ويميز بين ماي وماي
ماگال اليساوم بالعطش معذور
رفض ماغش ضميره وشرب كلشي الچان
العطش للماي هم اطباع
ولچ ياگاع
خسرتي الشاعر اليدعو واليسمعونه كون سباع
ولچ ياگاع
(راح ابنچ الگالوله تبيع وگال مايبناع)
حزن ياكادحين ابچو
ياعمال
يمضلومين
راح الچان باكيت الجگاير يشتري بالدين
بس بوكت المساوم
يفز يطفي الجگاره بگصة السجان
يفز چنه اغنه كل الناس
راح الداس فوگ التاج والسلطان
ونتو وقضاياكم شالكم ع الراس
راح الحزنه حزن الناس
راح الچان صوت الناس
ولك يانخل يامبيوگ
ولك ياماي يامبيوگ
ولك ياوطن يالكلساه مدخلينك اسير السوگ
گابلني البچي للفاگدين يلوگ
گابلني شيسكتنه انه ونت اليوم
مبيوگ ويگابل صاحبه المبيوگ
حزن ياريح طفينه الشموع ابچي
ياثواار ابچو اضعاف
اليوم العلم خاسر لون
وتابوت الشهيد الجاي خسر من اليشيعه اچتاف
ياثوار ابچو اضعاف
صاحبكم دفنته ولسى بي دخان
موينشم بقه الدخان بي ينشاف
يمتعوبين شمست وتتو خسرانين
بخت سدره ونخل مثمر وفي صفصاف
گبل وكته
وگبل وكته الحصاد شيوجع الفلاح
الوجع كسرة ضوه سهران چان بليلة المبيوگ
سكته وعالشبابيچ العيون صياح
كسر والروج بضلوع الولايه يباب
مثل الطير اليسافر گبل وكته
گبل والشمس لم حزنه وهويته وراح
گبل الشمس,, مربساحة التحرير
باس النصب,, باس اثار خيمتهم
ذكر ربعه
اشتهه يقره جديده بوسط لمتهم
ضحك من ذكر ربعه هنا
مثل شدة ورد بسم العراق تصيح
بچه من ذكر ربعه تطيح
ركض لصورهم الحلوه
مسحها من التعب والسهر والخذلان
گلهم ماتضيعون الوطن عنوان
بوسهم مثل ليبوس اخر مره چف امه
التفت فشر ع التيجان
راد يدخت وبطل
توجع ذكرياته هنا ويه الدخان
باوع للشعارات وذكر حلمه
صفگ من قره مكتوب
الزلمه الماتكرها السلطه موزلمه
باس الطين
چز كل حرف بسم المطعم التركي كتب بيت العراقيين
اخذ من دم اليحبهم,, كتب فوگ السمه تشرين
كتب ع الگاع
هذا الوطن مو موسم
نعمه بكل وكت ينباس
وخذ من ماي دجله وشرب اخر كاس
باس الجسر,, باس الناس,, باس احلامهم كلها
وخذ من ابن ثنوه جناح
ومثل الحلم باس الشمس غبشه وراح
وداعا يانبي المرواح
مودع بالله واللهفه مودع ياهدم عفه
ومن اشتاگلك وبرد احط بيدي العلم دفه
مااستغرب انت تروح موت الزلم مو صدفه
مودع بالله بس حاول تگل لحسين
گله من اخوتك كلساعه توگع عين
وزينب ع الجرف تجمع چفوف وطين
ورقيه الهسه تتيتم بأسم الدين
نفس العطش والدخان
وجونك ماوگف نزفه
مودع بالله واللهفه
كل الرثاء للشاعرين علي مهدي وزيد السومري هناااااااا
كل الرثاء 👈👈👈👈👈👈👈 هناااااا