 |
| باهر الجنديل انت اتخبل |
باهر الجنديل انت تخبل
انت اتخبل
انت اتخيل الحالة الوصلناها
وادم ما يعرفونك سألناها
والهدوم اللبسناها بمواعيدك
شگد صغرن علينا وما انطيناها
اذا جابوا اخبارك نبجي ..
اذا جابوك نذبحلك الاصيلة الما ركبناها
نگعدك وين ما ظلينا نبجي عليك
لأن اكثر برودة هناك تلگاها
هديتك ما گدر يكبر عليها تراب
مثلها گبور اهلنا ما مسحناها
ونغطيها احتراماً ما بقينا نشوف
مثل الناس اليغطون موتاها
وغفينا من البـﭼـي والا احنه سهرانين
ونومه الوفه دينه الليلة نمناها
ودكاكين العزاهم خلص من كم يوم
هيج عيوننا گوة فتحناها
هاي عيوننا لو ما فراگك جان ..
يگدر هالسواد يصير جواها
ونشدناهم عليك وگالوا مغيريك
وصدمتنا السوالف من سمعناها
گالوا عافكم گلنا احنه شمسوين
گالوا شگ صوركم ..گلنا فوگاها!
غلطتك ما تجي .. وغلطتنا منتظريك
وكتبنالك قصايد ما قريناها
احنه الـ بالمگابر دمعة ما يبجون
وعليك المغرب اتنگع لحاياها
هسه احنه جذب ما عايشين بخير
بنص الفوضوية الما فهمناها
نركض نلتفت ..تركض ورانا وجوه
ما ناسين ..بس ردنا ننساها