 |
| يحيى العلاق تجاهلني بع مكتوبه كتابه |
يحيى العلاق تجاهلني بعد مكتوبه كتابه
تجاهلني بعد
تجاهلني بعد وياي ثكل الدم
لا تنطي مجال اصعب وكابر هم
ضبط سوي روحك عود ما مهتم
والله تحبني حب بس الله بي يعلم
تراقب عن بعد كلبك عليه ايلوب
جرأة الـ بالكلب لو تنتقل للفم
جا كلمة احبك جزت ذاك الصوب
والاطرش سمعها واجه كلك تم
من اكعد اكبالك تلتفت ليغاد
مو يم القضيه وانته رب اليم
اسولف ويه غيرك احس بيك اتموت
فص عينك طلع ما اعرف اشدردم !
احجي بصوت عالي شدردمت لتخاف
من المنضغط متوقع اشبع ذم
ولو مرات ادك دكة خباثه وياك
اشوفك روحي واختل واكعد اتبسم
وتضل عينك تدور علي بين الناس
والبيدك يطيح ويغدي وجهك دم
هنا يبدي الضعف ويبين المبهم
بـ هاللحظة المشاعر صدك تترجم
حسبالك رحت لا ما رحت موجود
وهذا الوكع من ايدك دهاك الزم
دايخ بيه دايخ هسه شموازيك
فضها وكول احبك شلك بهـالـهم
يعجبك شكلي صوتي ووكفتي وممشاي
وحافظني حفظ تندلني وين انشم
متردد ابطبعك حذر مدري شبيك
ترجع الف خطوة وخطوة تتقدم
اذا حتى السلام اترده بالمثقال
ما اسلم اتكول شدعوه ما سلم
لكن هم اعذرك عقلك مأذيك
الله يساعده جم قسم يتقسم
مابين المكابر والخجل والشوك
والحب والشرف والنسب وابن العم
تره الدنيه كصيره والسنين اخفاف
من تتبده منك بعد ما تلتم