 |
| رائد ابو فتيان الخلل بيه مكتوبه كتابه |
رائد ابو فتيان الخلل بيه مكتوبه كتابه
الخلل بيه
الخلل بيه عفتني وماعرفت انساك
لا والله من الأول ماعرفت أهوه
ماترهملي صاحب مو حبيب تصير
بس ترهم بن آدم يوكَع ابلوه
مو بحجارة ربك يضرب بمحبوب
يحط روحك بواحد دمعة مايسوه
جنت ماعندي شي وتصيحلي ومآجيك
وتتوسل جبتها فدوة ما فدوة
عفتني والله نكتة تموت من النوح
بقيت أضحك وأون من كثر ماحلوة
هسه انت رحت طيرة وخذتها الريح
كَلبي شبي بدونك ماعرف يروه
أعاشر غيرك وأطلع وأطب وأشتاكَـ
ماكَلك وفه بس روحي محرومه
شفت الأحلى منك والأحب والزين
واهتموا بروحي وبقت مهمومة
ثاري العشكَـ موش تكَلب وتختار
مثل الموت هم كل واحد بيومه
التجارب فشلن وسميتهن نزوه
ردت أرهم الغيرك لچن مو كوه
مو كل حسره تعرف قيمة الدخان
الجكاره بشفة المرتاح مو حلوه
آنا وياك ام وأبن بس مو زين
أحن غصباً عليّ وتشح بالمروه
يذآك الـ بالسجن من تطلع افرح بيك
يجي الليل وتجي هم ذآبني ابلوه
انا مقيمك غلط والغير ما الومه
كَالوا مبتسم من كَلت شعلومه
فرحانينلك واني ابجي ختيلان
مثل وحده بعرس صاحبها معزومه
كطعت وياي اذا بلطيف اجيك تكوم
تفز فزة الشاف جنازته بنومه
بعده اخضر فراكك والشمس بت غيم
والخليته ذاك مبلله هدومه
شطلع بيه وعليك فراكي مر نشوه
وانه من اسبوع بايامك جنت لكوه
استشعرت الكرم بيه ولزمت لباب
مشاعر كلبي امس جديتهن جدوه
وجاملتك حضن كد ماصحت بردان
بس حضنيش صدري بصدرك اتجوه
هسه ازعل وما تهتم وانه من ايام
اذا ما ارضه تنطي شفايفك رشوه
هيه خلصت بس بعده الشوك ما خلصان
غيب وعود تلكه الما رايدك حان
كالو ينسي اليبتعد بس لتخاف
ايدي تهوه المكاود ماتهز فنجان
طري وجهي وبعد بي للمعاتب ماي
خاف تريد نتحاسب منو الغلطان
مشكلتي من احب من كلبي اصير انسان
وهذني جفوفي مارافعهن بدعوة
اعله واحد عافني ادري الخسر هوه
طيب واليضوك سوالفي ميخون
على اهل الشوكَـ نسمه وللربع خوه
امي بروحها تنست لمن ماجيت
وموش بجلدي صارت بالقلب نِسوه
وشنو الماخسرته ورايد اربح بيك
انا الشاطر المانصبوه قدوة
ومو شرط التعب بأنسان حصته يصير
الأسد حصته الزند والركض للبوه
هاي الدنيا مدري انت المهم تهون
صفه الشط صاحبي كَد ماكَلت فدوة
كل القصائدالوطنيه والرثاء للشاعر رائد ابو فنيان هناااااا
كل القصائد الوجدانيه للشاعر رائد ابو فنيان هناااااا
كل القصائدالحسينيه للشاعر رائد ابو فنيان هناااااا
كل القصائدالغزل للشاعر رائد ابو فنيان هنااااا