 |
| يحيى العلاق روحي عقلت وختلف قانونها كتابه مكتوبه |
يحيى العلاق
روحي عقلت
روحي عقلت واختلف قانونها
العشره التعب بلاها ودونها
وياك كلش صار باهت لونها
ماتقدر غيرك يقدرونها
منك انه شحصلت غير المرار
ودمعة اعيوني وسواد اجفونها
وحرگ اعصاب وسهر شتذكر اوف
طلعتها وياي من ماعونها
هسه احس مرتاح ياحب ياغرام
شوف وجهي وشوف صحتي اشلونها
اصدقاء اوياي شبان وبنات
العدها واحد ميت ايسلونها
على طول الوكت يحچولي نكات
روحي صعبه وعجزوا يضحكونها
مدري بيه الخلل متعلم عليك
مدري هي الناس مدري اشلونها
انت بعيونك تلمحلي بكلام
اشفافي عالماكو تشر اسنونها
المهم انتهت شلي بهالكلام
شحصلت ليلى شقبض مجنونها
ها شباب اليوم نطلع صايرين
اتوكلوا بالله الطرق تندلونها
احلى شله واحلى لمه واحلى مود
خايف احسد روحي ياخيعونها
لحظه لا هذا الدرب بي ذكريات
يعني من دون الطرق من دونها
كون ذيچ الشجره تنگص وتموت
وكون هاي المصطبه يشيلونها
خايف يسئلوني عنه افلان وين
ماعدا التسال دفن بعيونها
اشلون محد يدري لا يدرون زين
الفرگه شم الناس يشتمونها
فدوه ذاك الجسر لاتعبر علي
اهنا حلفنه العشره ايد منخونها
وگلي هم ايمر وكت تنساني بي
گتله من اجنازتي يشيعونها
وما نسيتك لا وحگ ذيج السنين
الدنيا اذا انساك اغير كونها
لازم انبدل الاماكن اي واذا
اشم عطرك وين ميخلونها
ولازم الغي الزمن واقتال الفصول
ابها وتشرينها وكانونها
وامحي اثر خطواتنا بكل الدروب
والحچايه اللي من امر يحچونها
انه اذا ناسيك ومغادر هواك
الرجفه هاي بجسمي شيسمونها
ليش اغاني التطلع اذكرني بيك
ودمعي ينزل گبل ما يبدونها
نعمة النسيان اكبر چذبه هاي
ماتصرف بعد لتعيدونها