 |
| الشاعر عصام كريم قصيدة الام |
الشاعر عصام كريم قصيدة الام
مدري شگمت أحس
مدري شگمت أحس من جبت طاريها
عشت كلمة اليمه بكل معانيها
رغم ما يمي أخوتي وعندي كومه اصحاب
احس الدنيا تفرغ وأمي تمليها
ادم ورث گاع وما گدر يرتاح
لأن هوه الوحيد الماله ام بيها
كبل كاتب شعر بس الابيات ايتام
وهاي امي القصايد راح اسميها
هسه توفقت خليت اسمها بيت
المره الثانيه بيت الله اخليها
امي السالفه الما تنحچي بديوان
سر براس ابوي وعمر خافيها
ورده وخضرت من چان شحت ماي
حصار وچان ربك صبر يسكيها
اجيبلها ذهب والصورته تندار
المره بلايه رجلها الذهب يچويها
اخذ هيجي وفه من عيونه للتابوت
الزلف شيب وما شايف تراچيها
مرات اشتهي اتنفس هوه الفردوس
واتعنه وأشم تراب رجليها
صرت بطولها واله بحضنها ارتاح
چبير انه و بعدني ادلل عليها
وأضحك بس چذب خاطر تطير وياي
وأكلها شماتلج لو ردت ابچيها
لمن تدعي احير بخدها من يالون
ترجف وأبدي اشك الوحي يحاچيها