الشاعر يحيى العلاق منو الكلك حضرة الزعلان
منو الكلك
منو الكلك من محبتك راح امل
اني احبك باجر وهسة وقبل
وك شملك اني مهووس ابهواك
الك حب ابكلبي ما شاله العقل
تريد سوشل ميديا احجيلك غلاك
انت الترند النسبتك ما تقل
هاك اخذ موبايلي وخلصني هاك
شوف طول الوكت بيمن متصل
الصادره انته اللم يرد والواردات
روح عالستوديو الجو مشتعل
صورتك ما تنترك مثل العلاج
ثابتة وباقي الصور تحديد كل
وغير صوتك محد ايعدل المزاج
بحة عندك ..عندي سوت رد فعل
من اروح الموعدك ماادري احير
بين احضنك وابجي وبين احتفل
اهنا يصير احساسي احساس الغريب
الختمو اوراقة ابختم لم الشمل
الروح اانت والنفس ولكلشي ول..
اتاكدت؟ هااا شكل ؟اي هلشكل
انت الاول بالبدايه وبالاخير
هاي هية وخلص ونسد السجل
حضرة الزعلان
حضرة الزعلان بيش امزعلك !
انه المداريك اكثر من هلك
تجرح وتقسي وشغلتي استحملك
شويه خل احچي الحچي مو كله الك
بحظك وبختك گلتلك يوم لا
من عرفتك صرت خيط ابمغزلك
تؤمر وتنهي وتريد وما تريد
والحرام الما يحل حللته الك
المشكله التعزه يتعزز عليك
والتصير وياه سهل يستسهلك
بس عليّ متعصب ووجهك ثگيل
السفن غرگت لو حريق ابمعملك !
زين اعرفك غرتك بعض الوجوه
الشياطين التجي بهيئة ملك
ايجوز ما امثل وابالغ بالكلام
الظاهر انته اتقدر اليستغفلك
انه لا اتأخر ابموعد عليك
ولا اتركك تنتظر لا بهذلك
هذا طبعك ماتحب الروحه بيك
وركض تركض ركض ع اليتجاهلك