 |
| اشاعر يحيى العلاق تسألني منو المثلي ابنضره |
اشاعر يحيى العلاق تسألني منو المثلي ابنضره
تسألني منو
انا الماشفت خير وراحه من بعدك
انا الماقدرت حبك وكتلك روح
وبحجة ضروفي ..ا تعمدت صدك
سمعتك كلام المايقبله انسان
شلون اتحملتني اشكد صبر عندك
على كلشي انتقدتك جنت قاسي وياك
منك بيش احسن خاطر انتقدك
احجيلك احجايه اجرحني مره وروح
حتى اقفل عليها وتنحسب ضدك
ليش وياي ساكت انته طبعك نار
من اتكون نايم فنه اليكعدك
وتبعد واعدتني.. جنت عد وعدك
بس تعرف شنو ابكل ثانيه افتقدك
ابيض جان گلبك مشتريني بروح
من اتكول احب اتگولها ابجلدك
باحساسك العالي ايدوخ البسدك
وبرقةكلامك تنفرد وحدك
صحاني البعد وبقيمتك حسيتك
اتريد الصدگ ..محد حابني ابكدك
اشكد مرو علي ..من قارنتهم بيك
حتى الكلي احبك حاول ايقلدك
تذكر من كلتلي الفرصه مره اتصير
توني استوعبتها وحللت قصدك
يافرصة حياتي البعد ماتنعاد
رايح للابد لو گلبك يردك
المثلي ابنضر
ه وحده الفكره توصله
اتوقع قريبا؟ عني يتخله
واصير انسان عابر حالي حال الناس
والتعب اتعبته..ينكر كله
والحب والمشاعر ؟ ..يامشاعر ها
ذني استهلكن و انرمن بالسله
طيب والرسايل؟ انته والمرسال
ابقائمة التجاهل راح تتخله
ماكلي ارد اعوفك ؟يعني مو اله
ليحس ماله داعي الباب يندله
ليحس اليحبه باله مو وياه
يكعد يمه ساعه وكلمه ميگله
اهنا يعني الكرامه قربت تنداس
اهنا يصبح وجودك منتهى الذله
لا بعده يحبني..اشبعد وشخله
ارجع للسوالف تعرف العله
اول وحده لمن صار رسمي وياك
الخطوه الثانيه ايدورلك الزله
لو يطلع وياك ابقصه مو عالبال
لو يدخل عليك ابلغز متحله
جذب تشويه صوره المهم يتبله
المايعرف يحب خل يسكت احسنله
الناوي يروح ..لو تسجدله هم يروح
عوفه ابراحته فدوه ابقى لتگله
والزم دمعتك وفرها لليسوون
لا تصرف دمع عالجاي يتسله
موشرط الجريمه اثر دم وسلاح
اليلعب عالمشاعر بشر كاتله
ربك مايضيع دعوة المجروح
باوع للسما وادعيله بالمثله