 |
| الشاعر سجاد صباح ياحسين العيشة صعبة |
الشاعر سجاد صباح ياحسين العيشة صعبة
ياحسين العيشة صعبة
العباس يخاطب الحسين)
ياحسين العيشة صعبة
والعطش بسنيني دين
ياحسين ابن المضايف
صعبة يتلگة اخيتة بلاية ادين
ياحسين الله شحلاتة
شفتة من اطيتة عين
ياحسين
ريشة الخوذة
تريد اتعيش بالجنة بجنح عبد الله ابنك
روحي روحك
واحسب الجربة جربتك
عوفني اخسر حتى عيني
عندي اهم شي ماخسرتك
ولا تگول اتوحدت وانكسر ضهري
عندك اختك
يابعد كل الخذوهن والبقن
كلبك اترف من حمامات الصحن
هدني خل امشي وارد نسمة لوريدك
صرت احس هذا النهر يشبهني حيل
اثنينة اشتاقينة لايدك
ياحسين استعضفوني
وگامو ايلچموني بال ها وينة اخوك؟
وكطعوني
ورشو اعلة اسنيني دم وذبلوك
ياحسين
ياحسين الروح محتاجة لضحكتك
وانتة تعرف راح المحتاج
من يفرك بدية
وانة فركة ايدي حسرة
رغم كل الصار احس بالدنيا خير
هاك ادية
وجيب راسك والرمح ونصير طير
نروح يم اوجوة تسوة
ياحسين
روح للسجاد قدملة اعتذاري
حتى اذا مالاحة شي من الشدايد
حتى اذا هاليوم يسلم
باچر يكتلونة وادفنة القصايد
ياحسين
انتة اول ميت يوزع هوة
وانتة اول مگبرة اتوزع ضوة
انتة اول صوت يطلع عالتقاليد القديمة
روح اخذ ثوبي اللبستة البارحة وخيطلي غيمة
ياحبيبي
انتة يا اول عطش يرويلة دنيا
انتة اول شيبة طلعتلي بگذلتي
بكل طريق اوياك رابح
اليوم اليشيلني اديك
وباچر انشال بحظرتي
ياحسين وداعتك زينب قضية
كل صباح العافية يذكرهه بية
الگة كل احلامهه امننكت اهدومي
تقرة بالمگلوب اسمي
تشوف سابع
حسب تاريخ المصايب
هذا يومي
اتقدم الف اسمي اعلة بائة
اتشوفة (عابس)
هذا هم محسوب اخوي
ياحسين
وحتى قصتنة قضية
كل طريق اوياك احسة بلاية جية
امنهد ماباسك محمد بالنحر
حضرت ادية
منّهد ماگلبك حرورة طلب
گمت المن نارة نارة
واترس ابراسي حطب
انتة ياتچوة لشكو واحد يطيح
انة المحيرتني شغلة
انتة مو تعبان اشوفك؟
ليش من ادخل ضريحك استريح
يامسيح اوياك اقيسة؟
المسيح انصلب كلة
وانتة بس راسك مسيح
كل شي بالدنيا اشتهاك
حتى ذاك السهم من دور علة ابنك
من اجة ماشاف ليشك شاف هاك
وحقة ذاك الرمح لمن يعتنيك
شاف كل اوجوهم ماتسوة
قرر يشتريك
حتى هاي الشمس مهضومة شفتهه
شافت ابوجهك ضوة اكثر من ضواهه
لملمت غبشة اعلة غبشة
وضلت تعامل عليك
وانتة حقك تنذبح
لان كل هندسهم يغطي ضواك
ذبحو بايدك صبح
لان كلش فاهي اليدگ بصدرهم
وانتة يدرونك ملح
انتة مايحتاج تشرحهه طلعتك
انتة لازم تنشرح
انة شفت احروفهم كثرت عليك
وانتة فاتح گلب ناسك يعني فتحة
وانتة تدري الفتحة خاچية الحرف
من شفت ساعي البريد الحطة الله
انگطع صوتة
حولت موتك رسالة
واختك الصارت ضرف
كل دمع بية انچفة وياة علم
كل حچي بروحي نبت فوگاة سهم
انة اريدك والعمر لچماتة ساعة
شما حلة الطايح
كبر حجم البشاعة
انة طايح والسما تنگط گرص
وانتة طايح والسما تنگط گصص
انتة فرصة والرمح دگ الجرص