 |
| سجاد صباج جنت تكدر |
سجاد صباج جنت تكدر
جنت تكدر
جنت تكدر تساوي العتب باللهفة
ولان ماعيشتني اوياك
صرت اكتب قصايد شاعر اتوفى
ولا عيش بمقارنتك
المثلك يطلع من الحرب مامغلوب
والمثلي العلاقة العابرة اتكلفه
يمك سافرت من حزني
للسكته
وبقمة خساراتي ، الربح چان انته
ويمرني الشوگ والغصة
مثل الكام متلهف لطاري اسمه
ويلكه السالفة الكاملها متخصة
وجنت بيومي الحجاية
العليها اندار
وانه بيومك مجرد واجب تخلصة
وشكد صعبة لمن انته باديها
بس تلگه بغيابك
كاملة القصة
الفرق بيناتنه
فرق السهر والنوم
تجي مرتاح بالموعد
واجي حافظ الراح احجيه قبلها بيوم
واني اوياك كابرنه
لامنك ولامني
الردود الباردة البردت مشاعرنه
وماتت كلمة الاني
بكثر ماچنت اكول احنه
اليميزني لمن بهت بعيونك
ردت تمشي
عرفتك انته ميجذبك شخص كامل
يجذبك شي..
وكلش عادي بعدك تنزل دموعي
هوه انه اعله قصة غيري اضل ابچي
والصدمة
من تسمع حجي اثنين اشخاص
ومن تنتبه تطلع وحدك التحجي
بعدك گلبي سد بابه
تره اصعب فرگه من ماكو طرف غلطان
وكلمن يملك اسبابه
وتناقضت
عايفتني انته لمت الحظ
واتذكر جنت خابص الدنيا اوياك
وعشت بعدك هدوء الطير التمرض
كسرتك باقية
شكد ماقصص مرت
تخيل انته عفت انسان
جان يشوفك بعمرة
عوض عن امه التوفت
شلونك بالك تگلي
تره لون الحبل مو مهم للمشنوق
وكرهتك لان شفتك بعدي تتباها
الضحك بعد الفراگ بفترة قلة ذوق
يبارد طبعك شمگساه
وانه طبعي مثل حنية اليسافر
اذا مارجعه اروح اوياه
جرح ابنادم احساسه
وحزن البيه حزن اهل المريض
الفاحصة الدكتور
ولمن طلع باوعهم وهز راسه
وعالحرية بعدي تسولف
شتقصد؟
وتكبر بيه من تبتعد
سم يغله بغله الترياق
وعالسويته چا رديت
بس مبدأ حياتي: النهايات اخلاق