حيدر حطاب

حيدر حطاب شفتج مره وحده

جا مابذرت لو عرفج من سنين

نضر عيني ولا باوعت للكمره ..

شفتج مره وحده شعجب ماترحين

من بالي ولو ماعندي الج ذكره ..

تغازلنا ولكن تنحسب عل طيف

مالحكنا كلشي نسوي بالنضره ..

اطيتيني مجال يكفي للتابوت

يلم اسنين واحد كلهن بكبره ..

تلاكينا وعرف ياخذ مكانه ابليس

ولكن مستحاي العاند الفكره ..

ذيج الساعه لو جان بمكاني الميل

جا كض الدقايق ذبهن بحفره ..

مالحكنا نرسم درب مابي ناس

واذا نحسبها ماتنقاس بالفتره ..

لاكيتني عيد وجنت انكط عوز

وهذن بينهن ماترهم العشره ..

ضحكتج ماتروح ورحتي ماتدرين

وراج انسان مدري شضاع من عمره ..

ولو غلطت عيوني الماتمد الشوف

اعلى كد غطها خبزه تعاين الفقره ..

سولفتي ونقص حسيت بالنعناع

بكد ماجانت انتي احجايتج خضره ..

خليتيني جمره بنص عراضه ريح

شيطفني اذا ما تسكت العبره ..

لكيتج نجمه بس عندج عرف بالكاع

تمشين وخيالج منكسر ضهره ..

مالومه الوراج يلهي روحه ( بكاس )

الورد لو شايفج هم جا ترك عطره ..

لا عندي عنوان ولا اندل البيت

ولا اعرف وراج شتنفع الحسره ..

دليتيني بالواهس .... الما يراد

جنح مكسور ويباوع على الشجره ..

ماادري شحجينا المهم جنت وياج

ارجف والغشيم تلوك اله الفطره .