 |
حيدر حطاب لمن عفتني, السهم كاروك |
حيدر حطاب لمن عفتني, السهم كاروك
حيدر حطاب لمن عفتني
لمن عفتني ورحت للماي جروف..
ماكتلي عن النهر محتاج جفوف ..
عباس دورتك غطه .. الما بردان
مثل الرساله بكل مواسمها ضروف ..
كالولي ما تبجي وعرفتك تعبان
من يبجي دم يرتاح عباس سيوف ..
اني ادري ترجع مثل عيد الميلاد
ماتنطي كاعك للعمر يزرع خوف ..
راحت الالوان القيد وجفوفي بخير
انه ادري بالحريه لون المخطوف ..
عباس لو ما واكف بوجه الماي
جا هسه لون الماي ماضل مألوف ..
كلما اشمك ضرف بيد المسجون
ماكتلي بالفركه الهوه يصير حروف ..
كالولي بعيونك سهم ما يدرون
من تنعمي عيونه القفل هم يشوف ..
عاتبتك الحد ما لكيتك شباج
حضره وصرت مثل العلك بي مفلوف ..
المعروف لمن تنسبي الدمعه اطيح
بس انه كلما ابجي اخضر معروف ..
باقه ورد خلكي اعلى طول الزوار
صدكني ليهسه النده بيه يطوف ..
صدكني يوميه الرضيع بـ كابوس
نشيل السهم من نحره ونكله طيوف ..
كل الجهال تنام من ينضربون
بسوط يلتم النعاس اعلـِ الصوف ..
الروس من تصلي مثل الشذرات
جامع المحبس تترس عيونه صفوف ..
عباس جي ماوكف مثلك شلال
ضليت اشوف الجبل وياك ارفوف ..
ماواكفه اعلى التل خيالي متانيك
حتى الخيال البيه مايمشي زحوف ..
احنه المطر بالغيم ذاك استنساخ
والمطر عيب يطيح والدنيا طفوف .
حيدر حطاب السهم كاروك
لعبد الله الرضيع
بعد حضنك صفالي السهم كاروك
ونمت عن لا اصيرن عثره للدين ..
بعده الهسه ماخانكني الكماط
العمر مايختنك لو مالكه سنين ..
لكيت الموت بـ جفوفك مراجيح
ومتت مثل الورد بيد السنادين ..
بعز اصباي راوني السهم شيب
سواد الكهوه من ضيم الفناجين ..
بعده استوه ينبض كلبي ماداك
بعدني الهسه بيه مبلل الطين ..
الدم يركض بنحري واكفه الناس
ميل الساعه يركض بالحياطين ..
النهر ماعرفه بس كلولي تابوت
مثل السجن بس مابي روازين ..
جفوفك حتى لو مابيهن وداع
يبقن. علـ نهر بس الشرايين ..
ماعندي حلم حتى اشتهي النوم
السهر مكتوب لعيون المساجين ..
كسروا خاطري يعرفونه شريان
ضلعي وبالكسر من وحده يلين ..
اليجي باله الخضار تعانده الكاع
بالطف جان خوف من البستاين ..
بالطف ما يجينه الضيف خطار
لو ... دفان لو يحرك دواوين ..
انه اول كماط يرجف السيف
حتى يصير عبره اعلى السجاجين ..
الرابي بحضن زينب يكره الماي
الضوه مايعطش بكيف الروازين ..
من بطن امي اجيت وللتجاعيد
رحت بمرايتي جنازه النياشين ..
محد مثلي جان مكـيف يموت
حتى السهم بيه يثبت الدين ..
حوار صريح هنااا
كل القصائد الحسينيه للشاعر حيدر حطاب هناااا
كل القصائد الوطنيه للشاعر حيدر حطاب هناااا
كل القصائد الرثاء للشاعر حيدر حطاب هناااا
كل القصائد الغزل للشاعر حيدر حطاب هناااا
كل القصائد الوجدانيه للشاعر حيدر حطاب هناااا