الشاعر فاضل حسن جر العمود بخيمتك

وتنگبتلك رايتك

وبساع زينب والحرم ركضن على حسين شافن نهر صوب النهر طالع من العين

عباس لا مو ساعتك

()()()

بساع انحنه ضهر العبي

والنوگ جهزت للسبي

وطوَّح دليلي طوَّح دليلي

وحسين چن نفسه انگطع

هالمرَّه عباس الوجع

شيصير حيلي شيصير حيلي

ماگال بس گال الكفل

من صَيد أمس گلبي انكتل

طاح بشليلي طاح بشليلي

گلناله إگعد ماگعد

گال استعدَّن للبَعَد

اهنا ياچفيلي اهلا ياچفيلي

ياخيّها زينب رادتك

عباس لا مو عادتك

عاد انته ابو چف الذي يعدل الموازين

شافن نهر صوب النهر طالع من العين

()()()

طارش موديك العطش

جبت النهر بس بنعش

شتريد حالي شتريد حالي

گوّه بلا چفك گمت

بگلبك علينه سلمت

وين البچالي وين البچالي

ها لو ترد ها لو ترد

الساني (بل ما ) ينعگد

صير ابدالي صير ابدالي

لا مِن أهل لا مِن ربع

شويه اعله ضهره وينگطع

حسينك يغالي حسينك يغالي

هم بيهه جيّه روحتك

عباس گلبي ولايتك

رِد جيتك تعدل الحچي يبن الدواوين

شافن نهر صوب النهر طالع من العين

()()()

من تصيحني أبعد وارتجي

اسمي على السانك يجي

لجروحي شافي لجروحي شافي

عن گلبي دگه اتأخرت

عطشانه لكن خضّرِت

اي دمعي صافي اي دمعي صافي

ذاك انته چن تحركت

ردت انه أجيك وماردت

نوم العوافي نوم العوافي

لحسين اعاين والتفت

اعذرني ياخويه خفت

ياضني كافي العباس غافي

راح أركض بعمري الك

يلچان أبوي مدللك

عاتبني لو بعدك ضگت فيّ الصواوين

شافن نهر صوب النهر طالع من العين

()()()

گمت أمشي خيط اعله المگص

أدرج بعمري الماخلص

طوّل زماني طوّل زماني

ماشيل راسي إمن الدمع

لاوشّل ولا بي نفَع

ولامِن عماني ولامِن عماني

ينحسبن ضلوعي مشط

مطويه چن طوية بسط

محَّد لِفاني محَّد لِفاني

ياگلبي غافلني ومِش

بس طير تلگه چفوفه عِش

المن متاني المن متاني

هسه انه وين انطي الوجه

الياهيمه ياخيمه أتجه

لاهُم يرجعولي هلي ولاهُم مدافين

شافن نهر صوب النهر طالع من العين

()()()

خو تدري مثلك مايصح

يلتعدل السيف بجرح

مو گلبي گاضي مو گلبي گاضي

هم تدري بعدك بالأسر

أمشي بأمر وأگعد بمر

والسوط ماضي والسوط ماضي

كل والده بسدهه طفل

ماضل أبو ويانه عدل

وبحكم قاضي وبحكم قاضي

ولو ننذبح مية ذبح

ومايطلع علينه الصبح

بس كون راضي بس كون راضي

شيصير أكثر ياهله

للجنة تمشي القافله

مانهِم بالموت وعلي بس انتو غالين

شافن نهر صوب النهر طالع من العين

كل قصائد الشاعر قاضل حسن الحسينيه هناااااااا

كل قصائد الشاعر قاضل حسن الرثاء والوطن هنااااااا

كل قصائد الشاعر قاضل حسن الوجدانيه هنااااااا

كل قصائد الشاعر قاضل حسن للسيد الشهيد هنااااااا

الحوار صريح هنااااااااااا