رائد ابو فنيان ادفني بخاطرك,
ردت ضحكتي وطك بالصفار الاوان
وبده يمر الورد بشفايفي الزركه
خير من الله قلت نسبه الدخان
وبدت نسمه نضيفه تمر على الشهكه
كبل جيتك عشتهه مكالب على النار
مثل العنده غيره ومااخذ حكه
انهجم بيت الكلب ماباجي ع الميتين
وعلى ابسط ذكرى منك يبجي وبحركه
الارض ماتشتكي كون التطيح نجوم
بس توجعهه كلش طيحت الوركه
السافر والغرك بلخنكه جنهم توم
وانه اثنيناتهم وغروب اجه بخنكه
ومن اخر نفس والله اصرفت ثلثين
انه بشحه هواء واتنفس بملكه
على ضيم جفاك والهم والسهر واليل
وسواجي دموع عيني وقلبي بلخفكه
لو يطلع نبي وشايل بدي قران
اول مايحرم كثره الفركه
ولو جابك زمانك وانا طيب ذات
بقلب سامح عدوه ياحقد تلكه
من باب العشاير راح افضهه وياك
وعيونك شيوخ ورايه متعلكه
دموعي الطايحه يطيحن حدر لفراش
وفده دك القلب من بابنه ادكه
وشكي وكثر ضني ودوخت الشمات
هذن كلهن فصلهن ينتهي بشبكه
بشرط من انحضن كون الخساره ضلوع
وتشك اذن الشماته ضلوعي بلطكه
كلهم مثلو لمن نويت تروح
واحدهم وكع من الحزن خركه
وضحك حد البجي من شافني بلياك
القبل ماتبتعد بس ثوبه ماشكه
ولان صايم عشك كدامي شربو شوك
وردت افطر بواحد مو وفي بعشكه
وانا خيول الحنين بصدري من تهيج
تذب الفوكهه وبجدامهه تسحكه
وموخمرة التردني اتمايل اعلى البيت
ماتدري شثكلها الروس المدنكة
وطبعا مايفوت براسك الاحجي
انا الشايفه ومرات م اصدكه