 |
| عصام كريم رثاء |
عصام كريم رثاء
رثاء للراحل احمد راضي
هذا انت الضوه المن وره التابوت
ويمكن نعشك الممنوع ينجاس
مو انت الدفنته اتصير بسكوت
ولا بجنازتك يمشون حراس
وعلي ابتشيعك المفروض البيوت
تفرغ والشوارع تنترس ناس
مو بجتافنه انشيلك عله الروس
ونرفعك جنك انته ورافع الكاس
ينجمه وما طفت من الثمانين
تظوي الناس فقره وجيل طيبين
وچان الموت مستفحل على الناس
حرب ولينجه منها يكتله وهواس
اوجيتت انته ابتسامه بنص معانات
ومدري ابجم كلب رجعت الحساس
ثبت النه المراجل والبطولات
مو لون الوجه وجفوف خشنات
مرات الجوف الترفه تنباس
يلبراسك لحت كل البعيدات
من عدها وعرفنه الغيره بلراس
نسيت هواي سولفت القليلات
جبيره سوالفك مو حجي وتنقاس
.....................
رثاء عن لسان صديق
ما مقتنع ميت اقنع شلون
بفاتحتك و أدورك باليعزبون
يوميه على بابك واكف اوگوف
ادگ وتخيلك بين اليطلعون
الك يالفتحت لعيون وياك
و اكتر بيك من عين اليحسدون
جنت ادري ورثيتك قبل متموت
لان جنت اول الناس اليضحون
يبو روح العزيزه الناسيه الموت
تلكيت المنيه بروحك شلون ؟
عين ودمعه ضلت عشرتي وياك
وعلى عشرت كبل وشلت العيون
تعال انزل وحي مر بيه بالطيف
ماتغني الصور عن اليموتون
يالمسرفن اردانك بس للضيوف
بهذاك العوز صفنت اليعزبون
اختصروك بكبر من قسته شبرين
ما چنك هذاك التارس الكون
يكولون اليموت يحس بالاحياء
و حديد يصير شوفه وكلشي يدري
يعني من أبجي يمك تسمع الصوت؟
وشفت شلون موتك كسر ظهري؟
انه دافن ضحكتي وبسمتي وياك
وبس لسوالفك فرغت فكري
سولفت بسوالفنه القديمات
اسولف مبتسم ودموعي تجري
شكو كلمة رثاء مرت على البال
وولا وصلت فكرة لشي بصدري
وين انطي الوجه لو مرني طاريك
بس انت اشتكيلك جبت عمري
..........................
مقطع رثاء للراحل خضير هادي
افرش اتراب الوطن وتغطه ودفه .. يانجم يلخلصت عمرك بعيد
..يا هلال الشعر خلصت..متت يالله اطوها عيد
متت مخنوك بقصيده .. ودفنو وياك الجديد
وصار شعرك مثل عطرك.. يغفه ويموت على صدرك
ولتكتله الغربه صدك ... هذا عد الله شهيد
مقاطع رثاء
...........................
ابيات رثاء الى ذالك الجميل الذي اشتشهد في انفجار مقهى الوشاش
فكلي كبرك خل اشمنك وارد
هاي صار سنين ما مشتم ورد
لويحس الكبر ماينضك عليك
انت من كلمت معاتب تنمرد
جفنوك بحصرت الوادم عليك
خاف من ليل الشته يجيسك برد
خبط دمك ويه دم الفجراك
الغاثني نخبطا براءه ويل حقد
بليل اذكرك ودعي من الله ونام
بلكي افز وحلم يطلع مو صدك
يا نده وحته الورد يتباهه بيك
ترفة روحك وينها ووين الحرك
النفس موش الفاتحه اقراها عليك
بلكي يوصل كبرك وما تختنك
سكت كلبك بس بعد روحك تدور
عكس غيرك ميت وكلبه يدك
..................
رثاء للشهداء
ام تنعى والابن
ملمت حيلي واعتنيته
وخنگه وعتب بيه وجيته
لامن فتحلي الكبر وانخاه
ولامن هوى الله اتنفسيته
يم گبرك ادنيت بسكوت
وكل ظيم گلبي سولفيته
رديت لا نيه ولا وين
وجدامي واهسها الدرابين
الدافنله غالي وعايفه سنين
عاين الحالي وذكريته
يصفن دليلي ويبجي بسكوت
وتدري الكلب من يصفن يموت
يمه على كبرك ماكو تابوت
تفصال يمه فصليته
لمولي دم السال عل كاع
وحنولي بيه كبور السباع
كلولهم بعنه الكبل باع
ودم الزلم بلزلم ما ضاع
بشرو العليه الدمع ينشف
فوك النعش والعلم رفرف
كلوله وين يريد يزف
للجنه لو للنجف لشرف
..............................
عصام كريم رثاء علي رشم هنااااااا
قصيدة الكرادة هنااااااااا
رثاء ل عبد الحسين الحلفي هناااااااا