 |
| الشاعر رائد ابو فتيان فك باب القميص,الفركه انواع |
الشاعر رائد ابو فتيان فك باب القميص
فك باب القميص سنين أدگ عالثوب
صرت حايط كثر ما واگف اعله الباب
وره بابك ثلج بس يچوي يعني النار
بس سمي جهنم خل اگلك طاب
شبت گتلك گلتلي الزمن هسه شلون
كل زرع الحدايق من جمالك شاب
والسياب مات وباقي بس تمثال
واذا للبصره توصل يعدل السياب
ومادگ الگلب صار الگلب چاكوچ
فلش صدري جالك وي غيابك غاب
وطبعا شعري يزحف من اسولف بيك
وراك البيت يزحف من تمر عالباب
وحينه انعرفه احنه وكل نهر مابي
وحبي الباب بيتك نهر جابه الماي
وتاريخ النهر بس بتجاه يروح
بس مي هالنهر كاضيهه رايح جاي
فتحه زغيره حلگك وناي سبع حلوگ
بس كل كلمه منك خلفتلك ناي
الجبال البتماسك مضرب الامثال
تركص جوبي الك لمن تمر يكحيل
النيازك ندري تنزل ترجم الشيطان
والك نزلن وصارن عالصدر زنجيل
ومادارت بعد صفنت عليك الكاع
وانت تكفلت ليل ونهار تشيل
تصد وجهك علينه يصير عدنه انهار
تصد تطينه شعرك صار عدنه الليل
ومن طخيت اديه مادريت شصار
وكع للكاع جفي وكضته ارداني
شايل جم سحر بعيوني لو صديت
مو بس كصتي تعرك يعرك اللساني
ولو ثگلك طفح وزنه اعله هاي الگاع
بس حبي اني كون وشلته بحظاني
انه بچبدي ارض زارعهه بس گلوب
شما تشلع گلب يطلعلك الثاني
الشاعر رائد ابو فتيان الفركه انواع
الفركه انواع هاي الفركه من يانوع
شتجيبك دمعتي لو كلمة الاسف
دخيلك شكي يكتل كلي اريد ارتاح
كلشي بداخلي من الغدر خايف
بديهيتي,وفراسة عقلي,والصدقان
بالاجماع كالوا غيرك موالف
وسد اذني الحجي الوادم وكلبي يصيح
يمعود عشرتك صارت سوالف
وتجيني الرجفه بس يارجفه ظكت اثنين
البرد ولموت لكن هيجي ماراجف
وهدد غيبتك وتجاوب بهجران
وتراجع,وتبعد واني اظل خايف
حلفت بكلشي اخونك بس اجذب روح
بعدني بداعتك ليهسه ماحالف
وباجر من تجيني تكلي خل نعود
الكلام بحلكي كله يصير ميخالف
منه شفت وعفت وبكلشي عندي اشباع
بس بحضنك اوكع جني ماشايفّ
الدفو بس بين حضنك حتى مو بالنار
اجه تموز عكبك واني احس بردان
مدري شصرت بعدك شو تفز الناس
مني وعلي كالوا هذا جان انسان
التخلفه االسنه خلفته انا بلحظات
خريف الله بوجنتي والدموع الوان
مصيف بالشته كالوا ومايدرون
الدمع من غيبيتك ماخلة بيدي اردان
يمر اسمك واكظ الكلب خاف يطيح
غفل زعيوني تشهك شهكة الغركان
عذر شلت الجكارة اورثتها بنار
امن اذكرك بالسوالف يطلع الدخان
وانت بغيبتك طاريي مامر بيك
وكلبك مايكلك وين صار فلان
ضميرك ماكعد ماشبع من النوم
ماشافتني عينك من رحت زعلان
عليك اتلفتت لفتت مهفه ابأيد
شايب سولة عندة حتى اذا بردان
وموهسه السهر ذبل سواد العين
من يوم العرفتك واني ما حلمان
انا سهرانلك من يوم ذاك اليوم
لمن كتلي شسمك وواني كلت فلان