 |
| عامر العيثاوي الحمد لالله كتفيت, ومضات |
عامر العيثاوي الحمد لالله كتفيت
لحمدلله اكتفيت بقلة الموجود
هم نعمة القناعة مسكتة ضنوني
خل تفرغ الدنيا
عيوني متروسات
وﻻ تنترس دنيا وفارغة عيوني
عشت عمري وكضيتة وقانع ومرتاح
شريد اكثر كضيتة وية اليحبوني
الناس الواصلتهم ثمر بيهم خير
اهم بلسانهم للناس وصلوني
وناس المني وصلو والنسوني بساع
عندي المهم وصلو خلي ينسوني
ال على متوني صعد لحد يلومه بيوم
مابي صوج آنة الناذر متوني
من حبي لضميري جنت احب الناس
ومافكر اﻻحبهم مايحبوني
لكو عبرت نهر
حيل وجسر ينراد
نكت بيهم الحيل وجسر شافوني
اودع بلعبر واتنة البعد ماجاي
واكولن عبرت ماكول داسوني
على قمة شرف راية انحسب عليت
مو حسبت مجرد جسر عبروني
الما عايش شموخ التضحية خسران
وفرق بين آنة اضحي وبين ضحوني
جبت عمري ثكيل وعالي مثل الغيم
بحضاني نهر وبسما يلكوني
وتضل منذورة روحي شوكت ميعطشون
اعصر روحي وانطيهم يشربوني
انة العمت علي طيبت كلب ولسان
طبيعي هواي عالم مايصدكوني
جنت وية الشماتة ارفع ادي مرات
عليهم ينكسر كلبي ويأذوني
طيحني يربي وخلي يرتاحون
خطية امنيتهم طايح يشوفوني
لوني من الله هاذ
الرادو يقلدوه
شكد خبطو الوان
وماطلع لوني
(ومضات)
جوعان من امس ماضكت طعم الزاد
مشغول بقصيدة وردت اكملهه
بطرك شهكة جكارة ويطلع الدخان
كرصت خبز يرسم وارجع اكلهه
كطعت لساني خاطر مااحاجيك
وخاطر ينتهي البينك وبيني
لكيت انوب عيني تسولف وياك
يعني شلون اكص لسان عيني
مثل شمس وكمر يتعاكبن للدوم
قطبين بحياتي انت والتابوت
وجه الموت من تشرق علي يغيب
من تغيب يشرق علي وجه الموت
مالك ناس غيري ومالي غيرك ناس
يعني اثنيننه ب الفركه نتبهذل
نادم على عنادي لروحي موش عليك
عﻻقة روحي بية مو مثل اﻻول
ماادعي عليك مسامحك لله
ادعي من الله ماحن لو هجر طول
لليسألني اكولن مالي حظ وياك
بس مدري شكل للروح اذا تسأل
مو شامت واكول اتختل من يفوت
مدري بياكتر عن روحي اتختل
الذنب ذنبي ادوسني الناس وتفوت
وعلى عزت نفسي عود اشكد حريص
مامرخص روحي بـٓس غليت ناس
لحد ماكامو يشوفوني رخيص.
عيني صاحت بية من شافتك جاي
وماسمعت عيوني التحاجيني
والله ماشفتك رغم عيني عليك
جنت سارح بالي مو يم عيني
مشيت وشوك يعدي صاب اﻻيام
وامس والقبله راحن يااكهن بوك
وحفاظا ع البقة كصيت السنين
خفت ﻻ ينتقل للباقية الشوك
وية كلبي اليوم فضيت النزاع
كلنة اليزل مرة وحدة نسامحه
واليروح بﻻ سبب نعتبره مات
تجي لو نقرة عليك الفاتحه
واحد انت بس بعيني اﻻف
اصفن ع الدمع من تبجيني
وباوع وجهك بكل دمعة التطيح
وشوف شكد اكو منك بعيني
امس رجعت طيفك راح مكسور
وانت توقعت من عندي تقصير
مو هينة علي يرجعلك الطيف
مجال براسي ماكو وطيفك جبير
الجروح استفحلن بية وخويت
وبعد مايرهم دوة لجروحي
ناسي روحي وعايش الكم من زمان
يمتة انساكم واعيش لروحي
جنت وياك انزل عيني ب الكاع
بوكت جانت باسمي تنرفع روس
وتدوس انت على انسانيتي وتفوت
وانه حتة على ضلك جنت مادوس
كل القصائد الوجدانبه للشاعر عامر العيثاوي هناااااا
كل القصائد الحسينبه للشاعر عامر العيثاوي هناااااا
كل القصائد الرثاء والوطنية للشاعرعامرالعيثاوي هناااااا
ﻛـــﻞ ﺍﻟـﻮﻣﻀـــﺎﺕ ﻟﻠﺸــــــﺎﻋﺮ ﺍﻟﻌﻴﺜــــــﺎﻭﻱ هناااااا