عصام كريم الامام الكاظم

قصيدة  ،  عام الفايروس القاتل  

كارونا

 

ماجيت السنه مولاي وتعذررر
وعلي خجلان ما متعلم  اتاخر
انته العلمتني شلون ادوس الموت
وشلون امشي ولعبوات تتفجر
خذتني العلطفه بس شفت بيه ارواح
 ما خفت المرض خفت الجهل يكثر
قران ونبي و14 معصوم
ماتصير بوجه واحدنه  اذا قرر
تكله اكعد ابيتك لا اتاذي الناس
يكلك تمنع الزوار ما تكدر
 اخذنه من لسجن بس الضلام البي
نسينه وما عرفنه شلون نتحرر
من جلادك اتعلمنه بس زنجيل
نلطم وامرض بصدورنه يفتر
شوكت انفتهم وحنه بكتلت العباس
نطبر راسنه ونصيح يا حيدر
من فوك  الجسر مولاي عل ميعاد
اجينه نزور كبرك يا اسد بغداد
مثل مهره الجسر ينكتنه وحنه نطيح
خياله احنه بس المهره بيهه اعناد
عاندنه المنيه ودسنه فوك الموت
بكثر ما كبل جسمك عاند الجلاد
راح بكل سنه نلبس جفن ونزور
غصبن عل قبل ولما قبل تنعاد
يفجرونه ونموت وننثر بلريح
هم توصل لكبرك ذره من ارماد
وتنزل علضريح وتلزم الشباج
بلهفه وتندفن بلترب وسجاد
كل ضنهم نخلص وحنه عكس الموت
شما ندفن جثث عدنه العدد يزداد
ضلام البل سجن شاء الله نور يصير
وزغر حيطان سجنك شفنه بيهه ابعاد
انت اول سجين ويكتب التاريخ
يقود الدنيه كلهه وهوه وما ينقاد
ونت اول سجين يخلص المعدوم
على احبال المشانق جنت تطي مراد
انت اول غريب تعرفه كل الناس
وتوزع امرادك حته للماراد

عصام كريم  الامام الكاضم (ع)