مكتول والتفكه عرف |
فاضل حسن مكتول والتفكه عرف
مكتول والتفگه عرِف...والصوبتني ذراعي
فدوه الحرامينه الترف...قدّمني بيده الراعي
مبخوت ماعندك بخت...حظك بكلهن تالي
بس للرصاص أكبر سهم...مضموم جرح الغالي
باچر وباچر ما إجه...الحد ما إجه كتالي
بتابوت لازم ينچتف...كلمن بحقه يداعي
مكتول والتفگه عرف...والصوبتني ذراعي
نفس الشوارع والمدن...الگلنالكم عمروها
خفتو عليها بيا وكت...واليوم تذكروها
المستشفى دكتور وأمن...چا أمس متحضروها
من چان ياخذنه النزف...مانلگه منكم ناعي
مكتول والتفگه عرف...والصوبتني ذراعي
گلتولنه وگلنه صدگ...بلكي الله هاي المره
غيرتو أوراق اللعب...بس الگلب شيغيره
ماعنده جيب الي انكتل...والباگ سالم عمره
مفتوح بس درب النجف...دگ النجف يشراعي
مكتول والتفگه عرف....والصوبتني ذراعي