عصام كريم قصيدة الشمعه
التمن.. والعتب مفتوح واصل للسمه السبعة
ظلمه وبس ضوه الشمعه
وقلم وافكار فوگ الراس مجمعه
وكتبلك شعر ويروح مثل الگبله متسمعه
الى ان بيه خط الشيب وتخيلته خط رجعه
ورجعت اكتب..
اذا عن حالي جاي تريد تسال
على الله وعل صدف لفراك عشته
خدي شما سكيته دموع يذبل
عكس خدك روه بدمي الشربته
حملتك من رحت سبعين محمل
وردت احمل افراكك ما حملته
عرفتك من كمت كل ساعه تزعل
دلالك ولحجي الزايد قبلتا
خف جدمك ووجهك كام يثكل
رحت ولهسه زعلك ما فهمته
لو ما تدري احبك وما اتحمل
ما محترك كلبي وبارد انته
وبده يخفت ضوه الشمعه
بحسره وسالفه ودمعه
البشر لمن يضكه الشوك
ويخونه حبيبه يسولف الربعه
انه اعرف وحدة الموضوع بس جبروني ع الطلعه
وبديت اكتب
اه يا صاحبي الخربت صحبته
الحجه بظهري وكلت مبريه ذمته
كبل سامع الغايب عذره ويا
ورحتله وما رضا ابعذري وعذرته
وذب الصوج بيه وكلت معذور
ما يلام ما يعرف معزته
ازرع طيب كالو تحصد الطيب
وانه اعرف ما يخضر ونتضرته
من عدها وعرفت بروحي غلطان
جبت الطيب بلصبخه وزرعته
هنا خلص ضوه الشمعه
ومن عاتبت اخوي القلم كض ضلعه
الاخ الما تفزعه الاخ بعد يا كلمه التفزعه
وجبرني اكتب
وغلاتك ولحليب الي جمعنه
وكسرت خاطري الما الها معنى
وحك دمعاتي يم ضابط التحقيق
ردنه نواجهك بيها ومنعنا
طمع وطينه لمن ما وضينا
بعنه هدومنه وما كلنه بعنه
وحك ذاك الشبه بلوجه ولصوت
خوه وما يفرزنه السمعنه
كبلك شوهن ظهري السجاجين
من كشفته الك جملته طعنه