 |
| قصيدة توني نسيتك ونتهت |
عصام كريم قصيدة توني نسيتك ونتهت
توني نسيتك وأنتهت مو هسه وكت الصدفه
بين الهله وال لا هله طالت وياك الوگفه
مديت أديك وسلمت
وضميت اديه ودنكت
مو من زعل لكن خفت
چنت استحي من الرجفه
شفت الزراگ وتيهت
مدري خطيتي بركبتك ما ادري بصمت شفه
بس انه عكسك من رحت
ضلت الذمه برگبتي
چن مشنقه وملتفه
شگد حاولت ردت أبتسم
لكن ثگل حتى الهدم
بكل حيلي وگفت الجدم
بس الدمع شيوگفه
العطشان يروه على شرب
بس عيني من تعطش تصب
يفززها اي صوت اليمر
وال على صوتك تغفه
وشچم خريف المر علي
وحلامي ورديه بقت
والروح خضره وترفه
يل علمتني بروحتك
كل الچنت ما عرفه
أتعلمت بعدك ما احب
ماضل عشك ما بي چذب
مثل الشعر من ينكتب
تلكه الصدك بي صدفه
لتحاول تمثل علي
ترسم بوجهك لهفه
صاعود مو توني صرت
شوفني سلاية نخل
وأعرفها من يا سعفه
ما اضن بلدنيا عذر
يبعد ولف عن ولفه
بيناتهم عارض نهر
بس جان مرسال البلم
ما بين ضفه وضفه
وما رهم لغيابك عذر
دورت لمن ايست
ورديت وبكلبي گلت
عندك عذر ما عرفه
التفاصيل
من وزن :- المجرشه القصيده تفعيله مفتوح
تاريخ الكتابه:- 2011/7/6
القيت
برنامج :- هيل وليل تقديم الشاعر رائد ابو فتيان
برنامج :- شهكت عشك تقديم الشاعر مهند العزاوي
القصيدة لحنها ازهر حداد
وغنها الفنان محمد السالم